Для ангельскага варыянту перакладаў фразу «капірайтэр зь цябе (гаворка ішла пра д’Дыдактыбля), як з сабачага хваста сіта». Перакладаў я, перакладаў, дый задумаўся, прычым адразу двойчы.
Па-першае, чым кепскае сіта з сабачага хваста? Гучыць абсурдна, так, але ж сіта — гэта не радыёпрымач, каб яго слухаць, а сіта! З авечай скуры, выходзіць, сіта зрабіць можна — згадайце залатое руно, — а з сабакі нельга?! А калі ўзяць вялікага сабаку, ды ў дадатак з густым падшэрсткам, ды ў той момант, калі побач не апынецца веганаў, сабачнікаў, змагароў за правы дзяцей, аматараў катоў... хоць гэтыя ў лік не ідуць — іх цікавяць толькі каты, а пра сіта з каціных хвастоў я ня чуў. Дык вось, калі ўзяць сабачую скуру ды выправіцца на Алдан мыць золата — чаму б і не? Набыць усюдыход, напхаць у яго прамывальныя латкі (Gold Pan), клясыфікатары, спэцыяльныя шлюзы, грунтасмокі, вашгерд ці герд... што б яшчэ ўзяць? Ледзь не забыўся: магніт для сэпарацыі, каб адсяваць магнітны жалязьняк, які падобны да дробнага золата і толькі нэрвуе падчас прамываньня. Дык вось, а на золатаносным ручаі ўсталяваць герд, і замест дзяругі паслаць на ягонае дно тую самую сабачую скуру з хвастамі? А потым дастаць з багажніка шуфель, каб зручна было гартаць ім грошы?
Другі раз я задумаўся, калі шукаў які-небудзь ідыяматычны выраз, што максымальна блізка пасаваў бы паводле сэнсу. І паколькі я ўжо ўцяміў, што «з сабачага хваста сіта» — гэта поўная лухта, то ідэальнага перакладу так і не знайшоў. Няма рамантыкі ў ангельскай мове, самі паразважайце: карысны, як шакалядны імбрык! (as useful as a chocolate teapot). У іх багата ўсялякага «As useful as»: як ровар для рыбы, як попельніца на матацыкле, як кішэня ў майтках, як воданепранікальны пакецік гарбаты... ці вось яшчэ: «As useful as a calculator that only shows prime numbers» — як калькулятар, які выдае толькі простыя лікі.
Іронія ёсьць, сарказм ёсьць, а рамантыкі — ані каліва!
Накідаў у тэкст ідыёмаў, і адразу закарцела прабегчыся па пунктах. Пра рыбу ня буду, а вось попельніца на матацыкле? Калі падысьці да справы творча, ды распісаць усе яе перавагі, асабліва падчас стаянкі, ды разьмясьціць ідэю на кікстартэры (я не пра матацыклетны, а пра краўдфандынгавы), то хай сабе не шуфель, але сапёрная рыдлёвачка з заплечніка можа спатрэбіцца, так?
Пра кішэню ў майтках: вельмі і вельмі патрэбная рэч. А куды пакласьці ключ ад нумара, ці жменю манэтаў на пляжнае марозіва, ласунак, піва сабе й маргарыту даме, зрэшты? Пра калькулятар — гэта ўвогуле выдатная ідэя, кожны матэматык з рукамі й нагамі адарве...
Пра воданепранікальны пакецік гарбаты я не пасьпеў падумаць, бо мяне захапіла ідэя новага дасьледаваньня — ідыёмаў для «адарве з рукамі й нагамі».